Envelope mean

Husi Wikipédia, ensiklopédia livre
Ezemplu balu husi pung pao ho dezeñu modernu.

Envelope mean (traditional 紅包, simplified 红包, pinyin hóng bāo) ne’e prezente osan ne’ebé ema fó iha Sosiedade xineza. Ema bolu naran ne’e tanba osan ne’e mai iha envelope mean nia laran. Ema-Xina dehan mós pung pao iha lian hakka (ne’ebé ema xina-timór ko’alia) lai si (利是, 利市 ka 利事) iha lian kantonense, no mós Ang Pao iha lian Fukien.

Kazamentu[edita]

Ema-Xina fó envelope mean baibain iha akontesimentu social ka família nian hanesan kazamentu ka loron-boot hanesan Tinan Foun (no iha situasaun ne’e bele mós dehan iha mandarin yāsuì qián, Template:Zh-t). Baibain ema mós uza envelope mean atu fó subornu ba polítiku sira iha Xina. Kór mean envelope nian hanesan símbolu rahun-di’ak nian no ema tau osan hira tuir númeru-sorte ruma (porezemplu númeru ruma ne’ebé iha 8 barak, tanba "ualu" ho lian xinés atu hanesan ho liafuan ba "prosperidade").

Tinan Foun[edita]

Durante Tinan Foun, katuas no boot sira (sira be kaben-na’in ona) baibain fó pung pao ba labarik ka foin-sa’e ne’ebé mai vizita, no ida-ne’ebé simu dehan liafuan ruma atu hetan sorte.

Iha sosiedade xinés, valór osan nian hira ne’e buat ida importante no sosiedade haree di’ak kostume ida-ne’e tanba fó-biban ba ida-ne’ebé simu atu sukat-tetuk didi’ak nia relasaun sosiál ne’e metin (forte) ka lae.

Inluénsia husi[edita]

Iha rain seluseluk iha Ásia mós iha lisan hanesan ne’e, kala tanba influénsia husi Xina. Iha Vietname, ema bolu envelope mean lì xì, atu hanesan ho liafuan kantonense, lai si. Iha Japaun, família fó prezente osan, ho naran otoshidama, ba labarik sira durante tempu Tinan Foun. Maibé iha Japaun no iha Koreia sira uza envelope mutin, ne’ebé hakerek naran husi ema ne’ebé sei simu. Iha Malázia, ema husi etnia malaiu simu prezente osan iha envelope modok ne’ebé iha dezeñu ka letra izlámiku durante Lebaran. Iha Tailándia, ema xina-tailandés uza envelope mean naran Ang Pow ka Tae Ea.

Lixi iha Vietname.


Ligasaun ba li'ur[edita]